اسهر معانا

اتكلمــــــــــــــــــــــوا

اتكلموا .. اتكلموا .. اتكلموا ...

محلا الكلام ، ما ألزمه و ما أًعظمه ...

فى البدء كانت كلمة الرب الاله ،

خلقت حياه ، و الخلق منها اتعلموا ...

فاتكلموا

فى البدء كانت كلمة الرب الاله

روح بجناحين شطار ، و صار للكون مداه .

آخر مطافها ، جت و حطت ع الشفاه ،

لما البشر ملكوا الوجود ، و استحكموا ...

فاتكلموا

الكلمة ايد ، الكلمة رجل ، الكلمة بــاب ،

الكلمة نجمه كهربيه فى الضباب

الكلمة كوبرى صلب فوق بحر العباب ،

الجن يا أًحباب من ما يقدر يهدمه ...

فاتكلموا

الرمل مرمى تحت قبة السما ،

مشتاق لقطره من المطر فيها النما ،

ملايين سنين عمره ما داقها ، انما

فيه كلمة تقدر فى المراوى تِعَوَّمه ..

فاتكلموا

فيه كلمة تقدر تزرع البور حور ضليل ،

و كلمة تقدر تجعل الكوخ بيت جميل ،

و ابو العيال و الجلابية الهلاهيل ،

فيه كلمه تعطيه مال ، و كلمة تِهندمه ..

فاتكلموا

لكم السلام ، يا ملفوفين حول اللهب ،

يا غواصين فى القلب ع الكلنه العجب ،

فى البدء كانت كلمة الرحمن سبب

و ما عادش غير الحق كلمة تِتَمَّه

فاتكلموا

البنت و الولـــــــــــــد

البنت فارت و الولد خنشر ...

يا داهيه دقّى ! .. ألف بعد الشر ..

يا ريتها كانت نزلة شعبية ،

و الا وجع فى البطن .. يتدبر .

الا اللى نابهم ، كان قضا وصابهم ،

مالوش دوا ، و لا طب ، يا سى أنور .

البنت فى الاعدادى لسّاها ،

كان إيه لزوم الغصن يتدور ...؟

و الا الولد ، ده يا دوب دخل ثانوى ،

ليه خده ينطر شوك ، بدا المنظر ؟

مش لما بس يكملوا علومهم .. ؟

ما كانش يومهم ، يا النهار لا غبر !

لو كان عليا .. لا واد ، و لا بنّيه ،

أخلى فيهم ( مللى ) يتغير ،

غير لما يبقوا أساتذه ، بماهيه ،

و بيت جميل ، مفروش على صغّير

التفريقــــــــــــــــة

أَنا بغبغان من ( افريقه ) .

حافظ نصوص كهنَه عتيقة .

بحرين و سِت جبال عديت ،

قزحت نص الدنيا ، و جيت ...

اللى لقيته ف أَمريقه

نفس الكلام ..

نفس الكلام ..

نفس الكلام ..

نفس الكلام ..

(1)

(كلام الرجل الأبيض)

أبيض ، وفنطازيه

و مراتى المظيّه

و ربنا اصطفانا ،

عشان حمرة قفانا ،

و شيّلنا الأَمانة ،

اللى تقل الرزيّة .

(2)

(كلام الرجل الأسود )

أسود ، و دمى حامى ،

حامى الحمى يا حامى ،

ما فيناش لونكم و لوننا ،

الكون ده كله كوننا ،

ماما مدَّياهو لنا ...

و مشهَّده المحامى .

(3)

(كلام الرجل المحامى )

محامى كبير قانونجى ،

و فى الكلام بِرِنجى

شايب و شكلى رائع ،

فاهم كل الشرائع ..

لا بيض و ده رأى شائع

أبيض ، و الزنجى زنجى

(4)

(كلام الولد الأبيض )

و الله (الجلاس) ما اوقه ،

يا الزنجى ينول حقوقه !

تلميذ ، و باستهجّى ،

لكن فى الرأى ... حجه ،

العالم بَّده رجّه ،

عشان تمسح فروقه !

(5)

(كلام الرجل الأفريقى )

يا ليل .. و البدر .. بمبى ..

يا ليل .. مقدرش انام بو ..

يا ليل .. أنا سجنى بامبو ،

و ان ماكسَّرتوش .. ده ذنبى !

عزيزى درش ..

زعلان قوى من ( أمريقه) ؟

علشان حكاية التفريقة ؟

عاوز صراحة و حقيقه ؟

الحل يا بنى ف ( افريقيه ) !

الأصل لما يزول ،

الظل برضه يزول !

سلم على خالتى شفيقة

الانتصــــــــــــــــــار

فيه لسهركن ف قلبى عاوز يبتسم

أرض الجزاير لسه تحت الاحتلال

أَنا قلت مش ممكن بلادى تنقسم

أَرض الجزاير جزء من أَرض القتال

و خرجت ثاير

رايح الجزاير

و نسيم بلادى معايا طاير بالبشاير

للأنتصار

مشيت مشيت لون الجراح ما غابش عنى

مشيت مشيت جوّه الرياح اهتف و اغنى

يا سهرانين اليل عليكم السلام

شدوا الزناد شدوا انتصارنا و قرّبوه

بكره الليالى تعود و يملاها الغرام

و كل طفل ينام سعيد فى حضن ابوه

يا دم يا احمر

ع الزرع الاخضر

أهل الجزاير بدروك علشان تزهّر

للأنتصار

هناك هناك فوق الجبال آخر طريقى

هناك هناك وسط الضال واقف شقيقى

بنظرة مليانة حنان ضّم الوطن

ضَم السنابل ضَم أَغصان الزتون

و رفع سلاحه وخَط فى جبين الزمن

ميعاد لحرية بلاده راح يكون

و أنا سبت أَرضى

و فيها وردى

رايح الجزاير بالرصاص أَأَدى فرضى

للانتصار

راح ننتصر و نشوف سلام و ايام جديدة

راح ننتصر و نعيش كرام فى بلاده سعيدة

و انا حامشى و امشى و امشى ف سكتى

و اوصِل و اضم إِيديا لألوف لألوف

و انزع من المستعمرين حريتى

و انشد مع الثوار و إِحنا فى الصفوف

أَنا جاى ثاير

و يا الجزاير

و نسيم بلادى معايا طاير بالبشاير

للانتصار

[وحدهم المديرون لديهم صلاحيات معاينة هذا الرابط]

احنا التلامــــــــــــذة

يا عم حمزه ،

احنا التلامذة .

جن و بلاوى مسيّحه من غير مؤاخذه

نكبر ما نكبر ،

الله أكبر .

طول الزمان ع الامتحان داخلين مبارزه !

هل من مبارز ؟

هل من مناجز ،

هل من معارك فى البلد دى ، لسه عايزه ؟

هل من منادى ؟

و نفير جهادى

قال لك : أجل ! .. لسه العجل فى رمله غارزه !

لسه ف طريقنا للأَمال ،

و الرمله من كل جهه ..

زقه مع زميلكم جمال ،

يا عقولنا يا متنبهه !

الرمله حلوه ع البلاج ،

حلوه على باب الفرح ،

لكن لحد كده و بلاش ،

أَحسن شعورى بينجرح .

اسفخص على لون الاصفرار

و الفقر ، والخوف ، و المرض

ماشفته الا و دمى فار ،

و حلمت بيه زال ، و انقرض .

كابس علينا الشئ ده ليه ؟

هو انجليز .. ؟

و الاتتر ؟

دوكهم خطر ، قمنا عليه ،

رياح ما خلتلوش أَتر .

كان برضه أمشير زى ده ،

.. كان برضه أَمشير زى ده ،

كان برضه فبراير كده ،

قمنا جموعا حاشده ،

سلاحنا أَنشودة فدا ..

احنا الجواب ، واحنا الندا ،

و احنا التلامذه المنجده ..

يا عم حمزه ما شتناش ؟

.. الدنيا شافت دمنا ،

حنّه ، على ايدين أمنا ،

حلفت يكون عيد باسمنا ،

عيد ابتدا و لا انتهاش ..

يا عم حمزه ،

(لا ماليف) و همزه

لأَ .. مش عاوزين عيشة و ارثين

و لا دنيا جاهزه .

ده ابو سد عالى ،

شهران ليالى ،

زى التلامذة ف الامتحان .. يا عم حمزه .

اتنين صباحـــــــــــــــــا

النور ملو الشوارع ،

و مليون راديو والع ،

الساعة اتين صباحا ،

لكن إيه الموانع !

.. الخلق رايحة جايه ،

و الدنيا لسه حيه ،

مليانه بالهأَو أَو ،

و زعيق القهوجية .

.. واحد يقول لواحد :

خليك يا عم قاعد ،

التانى يقول له : شكرا ،

ده انا م المغرب مواعد ،

فيه سهره لسه عندى ،

فى بيت فلان افندى ،

ح ناكل حاجة حلوه ،

و نشرب تمر هندى ..

و اللى تروح دالقه جردل ،

فوق حضرة المبجل ،

طبعا صاحبنا يزعل ،

و ينفجر شتايم ...

و الحى كله يوصل ،

ما بين مصلح و لايم ،

اللى يقول :

يا جماعة ...

و اللى يقول : يا بهايم ...

و مطرب الاذاعة ،

يصرخ ، و ف وجده هايم ..

و لو طرطقت ودنك ،

فى وسط دى العظايم ،

تسمع مسحراتى ،

بطبله صوتها واطى ،

بيقــــــــــــــــــــول :

اصحى يا نايم

الهلال الجديـــــــــــــــــــد
هل هلالك شهر مبارك ،

يشبه ضحكه سهيانه .

ضحكة مخبية ، معبيّه ،

ضحكه مليانه

أسرار خفيانه .

آه يانا يا جديد من سِرّك

آه يا نا .. يانا .

غمّت عنيا على هلالى ،

و ندهت لأصغر أطفالى ،

سيَّبنه دروسه

لجل استفتح شهرى بصورته ،

و ف قورته أَبوسه ،

و استنى الخير من دنيانا ،

أنا بوسته ، و فَتّحت ،

بصيت له ، و سرحت ...

كان راخر برضه ، بيضحك لى

ضحكه سهيانه ،

مليانه أسرار خفيانه

... يا محتار يانا .

تركى بجـــــــــــم

تركى بَجَم .. سِكِر انسجم

لاظ شقلباظ

اتغاظ هجم

أَمان أَمان ... تركى بجم

دبور جبان من غير زبان

زنّان كبير ... يمضغ لبان

يسمع نفير يخاف يبان

أَمان أَمان ... تركى بجم

سوس بازفان ... اقطع لسان

عربى واقف لك ديدبان

ادخل تموت جّنات مكان

أَمان أَمان ... تركى بجم

سيكتير زمان ... سيكتير كمان

ادخل ح نضرب فى الملان

خليك تقول أَنا جلفدان

و لا ينفعوك الأمريكان
[وحدهم المديرون لديهم صلاحيات معاينة هذا الرابط]

شكرا لك على الموضوع الرائع

» حكم عمنا صلاح جاهين
» قيصيدة لعمنا صلاح جاهين عى اسم مصر
» أصل صلاح القلب
» ادعية صلاح القلوب
» ايه رأيك في حازم صلاح ابو اسماعيل..

اسهر معانا

لمـا نقولـ شعر يبقيـ اكيد صلاح جاهين....